..
وشذا الكلام وشذا التبرير..؟؟
بأذكر لك موقف ذكرته قبل كذا، عشان تعرف وين حنا عايشين..
1413هـ كان عام مأساوي للنصر بكل ما تعنيه الكلام.. إذا كنت تذكره..
1414هـ عام للتاريخ للمجد .. كان الهريفي هو بطل الموسم ذاك بلا منازع..
بعد موسم من الإخفاق، ساهم الهريفي بقوة في حصول النصر على الدوري.
1415هـ في كأس الاتحاد ( الامير فيصل حالياً ) على ما أذكر..
النصر يلعب أمام الاتفاق ويأكل 4 صفر في الملز كان الوقت عصر، بوجود الهريفي..
الجمهور سفل به.. العنوه وصيحات استهجان قوية ضد الفريق، والهريفي بشكل خاص..
تدري ليه بالغوا في الصراخ ضده من بين اللاعبين مع أن مستوى الفريق كله كان سيء؟
لكن لأنه هو الكابتن وهو النجم، وهو الي حطوه فوق رؤسهم وقت الفوز،
لذلك كان من العدل أن يتلقى نصيبه وافي من الاستهجان بنفس نصيبه من المدح الذي يلقاه..
هل تتوقع الهريفي.. حك رأسه مثل ما تقول عن الحارثي..؟
هل تعذر بنفسيتي كخة خلاص.. الجمهور وسخ يمي..!
طيب هل تتوقع أنها مشت عليه ولا أثرت فيه؟ راح نشوف الحين..
شد حيله.. وأسهم مع الفريق في تحقيق الدوري.
ولما اعتزل الله لايعيد ذيك الأيام،
كان من ضمن الأسئلة التي وجهت له: موقف لا تنساه ( أو مباراة لا تنساها )؟ نسيت بالضبط.
قال: مباراتنا قدام الاتفاق لما انهزم بأربعة،
كان الجمهور سبني بقوة مع أني الموسم الي قبله ( يقصد 1414هـ )،
حققت لهم الدوري!
شف الفرق.. هذا يحك رأسه لأن الجمهور صارخ عليه.. ويضحك مع المرشدي والفريق فيه أربعة..
بينما الهريفي من صراخ في مباراة وحدة تحرك وقعدت على قلبه سنتين لين صرح بهـ الموقف..!
ما نسى الموقف لأنه مرة وحدة حصل له..
ما نسى الموقف لأنه يحترق ولا ينسى..
لاحظ مع أنه الهريفي وما أدراك مالهريفي..؟
لكن لو تسأل الحارثي كم مرة صايح عليك الجمهور..؟ ما قدر يعدها!
الله يا ذاك الزمن.. ما كنا نعرف يا لبى قلبك يا أبو عبد الله.. ما كنا نعرف تفداك البلنتي يا بو هريفي..!
مع أنهم يحققون البطولات.. أجل هـ النوعية الي ما تدل المنصات وش نقول عنها!
كما تكونوا يكون الجمهور معكم..
تبدع.. يصفقون لك.. تخنبق يصايح ضدك..!
قل له إذا كان نفسيته تعبانة:
بعض الجروح إن جت من ريح النفل والخزامى زين الأطياب!
أما حركة الجمهور: فيقاروا فيقاروا..
الحين تأكد لي أن الجمهور يتحمل جزء كبير من المسؤولية..
والله أني أذكر أن الجمهور كان يصايح على كندي وناصر الفهد والدحيدح؟!!
مع أنهم يخدمون الفريق يحققون بطولات..
بس ممكن لأن السبب أنهم ما يعرفون يقولون قصائد مثل الحارثي ولا حب الخشوم مع الشهراني والقحطاني!
وهذا جوابك: كيف تبون بطولات وأنتم تديرون الأمور بهذه الطريقة؟
لاعب يطلع بأحمر ويصفقون له..
لاعب يخنبق طول السنة ويطول لسانه في هـ التصاريح، ومن هدف واحد نتجاوز عنه..
يجب على الحارثي وغيره، أن يعرف أنهم في النصر،
وهذا قدر النصر، يا تلعب زين أو بيسفلون فيك..
رضيت أهلا وسهلاً.. ما رضيت شف لك فريق غيره،
أو حقق له بطولة يغضون الطرف عنك شوي!
..
